შემოსავლების სამსახურმა 10 ათასზე მეტ კომპანიას არაკვალიფიციური დღგ-ის გადამხდელის სტატუსი მიანიჭა, რაც იმას ნიშნავს, რომ ამ საწარმოებს საგადასახადო ანგარიშ-ფაქტურების გამოწერა აეკრძალათ.
კერძოდ, შემოსავლების სამსახურმა 20 534 კომპანიის განაცხადი განიხილა, საიდანაც კვალიფიციური დღგ-ის გადამხდელის სტატუსი 10 505 საწარმოს, ხოლო 10 029 პირს არაკვალიფიციური დღგ-ის გადამხდელის სტატუსი მიენიჭა. როგორც უწყებაში განმარტავენ, 10 ათასზე მეტმა კომპანიამ ვერ წარადგინა ინფორმაცია ეკონომიკური აქტივობის შესახებ. შესაბამისად, მათ საგადასახადო ანგარიშ-ფაქტურების გამოწერისა და დადასტურების უფლება შეეზღუდათ.
აუდიტორულ კომპანიებში კი აცხადებენ, რომ კრიტერიუმები, რომლის გამოც კომპანიას შესაძლოა აღნიშნული სტატუსი მიენიჭოს, საკმაოდ ფართოა და იძლევა შესაძლებლობას, მათ შორის კეთილსინდისიერ საწარმოს ფუნქციონირება შეუჩერდეს. შესაბამისად, ბიზნესი აღნიშნული კრიტერიუმების გადახედვას ითხოვს.
„გასაანალიზებელია, რამდენად იყო რისკი, რომ ამ ოდენობის კომპანიებს ყალბი ანგარიშ-ფაქტურები გამოეწერათ. იქიდან გამომდინარე, რომ კრიტერიუმები საკმაოდ ფართოა, მათ რიცხვში შესაძლოა მოხვდნენ კომპანიებიც, რომლებსაც ყალბ დღგ-სთან არანაირი შეხება არ აქვთ. ძალიან ცუდი იქნება, თუკი ასეთ საწარმოებს მიენიჭებათ დღგ-ს არაკვალიფიციური გადამხდელის სტატუსი, რადგან ანგარიშ-ფაქტურის გამოწერის შეზღუდვა პრაქტიკულად ეკონომიკური საქმიანობის შეზღუდვასაც ნიშნავს“,- განაცხადა „ბიზნეს ფორმულასთან“ Kreston Georgia-ს მმართველმა პარტნიორმა, დავით პაპიაშვილმა.
ცნობისთვის, შემოსავლების სამსახურმა არაკვალიფიციური დღგ-ს გადამხდელის სტატუსი არაკეთილსინდისიერი გადასახადის გადამხდელების გამოვლენის მიზნით შემოიღო. კერძოდ, მას შემდეგ, რაც გახშირდა ე.წ. ყალბი დღგ-ების საქმე, ანუ რიგმა კომპანიებმა ყალბი საგადასახადო ანგარიშ-ფაქტურები გამოწერეს.