სამოქალაქო ავიაციის სააგენტოს ინფორმაციით, 11 აგვისტოდან "ჯორჯიან ეარვეისი" მინსკის მიმართულებით დაიწყებს რეგულარულ ფრენებს.
ავიაციის სააგენტოში კომპანიის მიერ წარმოდგენილი ფრენის განაცხადის შესაბამისად, რეისები თბილისსა და მინსკს შორის 30 ოქტომბრის ჩათვლით, კვირაში 3 სიხშირით, ყოველ ოთხშაბათს, პარასკევსა და კვირას შესრულდება.
სააგენტოს ცნობითვე, "ჯორჯიან ეარვეისს" თბილისი-მინსკის მიმართულებებით ოპერირების ნებართვა უკვე მიენიჭა.
ამ დროისთვის ბელარუსის სახელმწიფო ავიაკომპანია "ბელავია" თბილისის, ბათუმისა და ქუთაისის აეროპორტიდან უკვე დაფრინავს. აღსანიშნავია, რომ მას შემდეგ რაც 23 მაისს ბელარუსის საჰაერო სივრცეში Ryanair-ის თვითმფრინავი, რომელიც ათენიდან ვილნიუსში მიფრინავდა, სამხედრო ავიაგამანადგურებლებმა მინსკში იძულებით დასვეს და ქვეყნიდან დევნილი ჟურნალისტი რომან პროტასევიჩი დააკავეს, ევროკავშირმა ბელარუსს სანქციები დაუწესა, რაც ასევე მოიცავდა "ბელავიასათვის" ფრენების აკრძალვას.