ფრანგული ავტომობილების გაყიდვები ივლისში 35%-ით შემცირდა. ნახევარგამტარების დეფიციტმა ევროპის ერთ-ერთ უდიდეს ბაზარზე ინვენტარი შეზღუდა.
საფრანგეთმა თვის განმავლობაში 115,713 სამგზავრო მანქანა დაარეგისტრირა. წლის პირველი შვიდი თვის განმავლობაში, რეგისტრაცია 16%-ით გაიზარდა 2020 წლის ანალოგიურ პერიოდთან შედარებით, როდესაც გაყიდვები პანდემიის პირველი ტალღის დროს შემცირდა.
შემცირებული შედეგი კიდევ ერთი მაჩვენებელია იმისა, რომ ევროპის ავტოინდუსტრიის აღდგენა უფრო ნელა მიმდინარეობს, ვიდრე აშშ-სა და ჩინეთის. ევროპის საავტომობილო მწარმოებლების ასოციაციის უახლესი მონაცემები აჩვენებს, რომ რეგიონში პირველ ნახევარში თითქმის 2 მილიონით ნაკლები მანქანა გაიყიდა, ორი წლის წინანდელ მაჩვენებელთან შედარებით.
Renault-ი პროგნოზირებს, რომ ჩიპების მიწოდების შეფერხება წელს წარმოებას დაახლოებით 200,000 მანქანით შეამცირებს, რაც ორჯერ აღემატება წინა შეფასებას.
Bloomberg-ის ორიგინალური სტატიის ავტორი: ტარა პატელი