“ჯანდაცვის მსოფლიო ორგანიზაცია” (WHO) Sinovac Biotech-ის Covid-19-ის ვაქცინის შესახებ დამატებითი ინფორმაციის მოძიების პროცესშია. ვაქცინისთვის გადაუდებელი მოხმარების ავტორიზაციის მინიჭების საკითხი მიღებული ინფორმაციის საფუძველზე გადაწყდება.
The Wall Street Journal-ის წყარო, რომელიც WHO-ს მაღალი რანგის წარმომადგენელია, ვარაუდობს, რომ ვაქცინის ავტორიზაციის შესახებ გადაწყვეტილების მიღება ივნისამდე გადაიდება.
ორი დღის წინ ტაილანდის პრემიერ-მინისტრმა პრაიუთ ჩან-ოჩამ განაცხადა, რომ Sinovac-ის ვაქცინა WHO-ს ავტორიზაციას ამ კვირის ბოლოს მიიღებდა. ამის შემდეგ "ბიზნეს ფორმულა" "ჯანდაცვის მსოფლიო ორგანიზაციას" (WHO) დაუკავშირდა. ორგანიზაციის მედიასთან ურთიერთობის დეპარტამენტმა გადაწყვეტილების მიღების შესახებ სავარაუდო თარიღების დასახელებისგან თავი შეიკავა.
“Sinovac-ის პროდუქტის გადაუდებელი მოხმარების სიაში შეყვანის შეფასების პროცესი მიმდინარეობს. ტექნიკური საკონსულტაციო ჯგუფის შეფასების დასრულების შემდეგ, შედეგს საჯაროდ გამოვაქვეყნებთ”,- ნათქვამია “ჯანდაცვის მსოფლიო ორგანიზაციის” სპიკერის, ტარიკ ჯასარევიჩის მიერ “ბიზნეს ფორმულასთვის” გამოგზავნილ წერილში.
მისივე თქმით, WHO-ს იმუნიზაციის ექსპერტთა სტრატეგიულ მრჩეველთა ჯგუფის (SAGE) დღეს ჩანიშნული შეხვედრა გადაწყვეტილების მიღების პროცესთან კავშირში არ არის, რადგან ნებართვის შესახებ გადაწყვეტილებას იღებს ტექნიკური მრჩეველთა ჯგუფი (TAG) და არა SAGE.
იმუნიზაციის ექსპერტთა სტრატეგიულ მრჩეველთა ჯგუფის (SAGE) მიერ Sinovac-ის ვაქცინა უკვე შეფასებულია დადებითად.
The Wall Street Journal-ის წყარო ასევე განმარტავს, რომ ვაქცინების დასავლელი მწარმოებლები, როგორებიცაა AstraZeneca, Pfizer-ი, Johnson & Johnson-ი კარგად იცნობენ ავტორიზაციის პროცესს და მათმა ვაქცინებმა გამოყენების ნებართვა უფრო სწრაფად მიიღეს. Sinovac-ის ვაქცინის დაგვიანების მიზეზი კი ამ პროცესში მისი გამოუცდელობა გახდა.
საქართველოში Sinovac-ის ვაქცინით 18+ მოქალაქეების აცრა 24 მაისს დაიწყო. ის ტრადიციული, ინაქტივრებული ვირუსის გამოყენების მეთოდითაა შექმნილი. ვაქცინის 2 დოზა 21 დღის ინტერვალით კეთდება.