"ჯანდაცვის მსოფლიო ორგანიზაციის" (WHO) ხელმძღვანელი, ტედროს ადანომ გებრეისუსი კორონავირუსის საწინააღმდეგო ვაქცინით აიცრა. ამის შესახებ მან Twitter-ის საკუთარ გვერდზე დაწერა.
"დღეს კორონავირუსის წინააღმდეგ ჩემი ვაქცინაციის რიგი იყო. ვაქცინები სიცოცხლეს გვინარჩუნებს. კრიტიკულად მნიშვნელოვანია, რომ ვაქცინები ყველა ქვეყანაში მაქსიმალურად მალე იყოს ხელმისაწვდომი. თუ ჩემ მსგავსად, ცხოვრობთ ქვეყანაში, სადაც ვაქცინები ხელმისაწვდომია, გთხოვთ, აიცრათ, როდესაც თქვენი რიგი მოვა",- წერს გებრეისუსი.
Today it was my turn to get vaccinated @Hopitaux_unige against #COVID19. Vaccines save lives. It’s critical to get them to all counties A.S.A.P. If like me you live in a country where vaccines are available, please get vaccinated when it’s your turn. pic.twitter.com/ioNMLH5TW9
WHO-ს ხელმძღვანელმა კიდევ ერთხელ აღნიშნა, რომ დღეს მსოფლიოს მასშტაბით ვაქცინებზე ხელმისაწვდომობა უმნიშვნელოვანესია. მისი თქმით, ამისთვის, მთავრობებმა, ფარმაცევტულმა კომპანიებმა და სხვა დაინტერესებულმა მხარეებმა უნდა აიღონ მეტი დოზების წარმოებისა და გაზიარების ვალდებულება, რათა ყველა იყოს დაცული.
56 წლის ტედროს ადანომ გებრეისუსი ჟენევის საუნივერსიტეტო ჰოსპიტალში აიცრა. უცნობია, თუ რომელი ვაქცინა გაუკეთდა მას.
ამ დროისთვის შვეიცარიაში სამი კომპანიის Covid-19-ის ვაქცინაა დამტკიცებული. ესენია Pfizer/BioNTech-ი, Moderna და Johnson & Johnson-ი. თუმცა Johnson & Johnson-ის გამოყენება დაწყებული არ არის.
ჟენევაში 45-64 წლის ასაკობრივი ჯგუფებისთვის საყოველთაო ვაქცინაცია 12 აპრილს დაიწყო.