"ჯანდაცვის მსოფლიო ორგანიზაციამ" (WHO) Sinopharm-ის ვაქცინა საგანგებო გამოყენებისთვის დაამტკიცა.
პეკინის ბიოლოგიური პროდუქტების ინსტიტუტის მიერ წარმოებული ვაქცინა კორონავირუსის რიგით მეექვსე ვაქცინაა, რომლის უსაფრთხოება, ეფექტიანობა და ხარისხი WHO-ს მიერაა დამტკიცებული.
"This afternoon, WHO gave Emergency Use Listing to Sinopharm Beijing’s #COVID19 vaccine, making it the sixth vaccine to receive WHO validation for safety, efficacy and quality."-@DrTedros
WHO-ს გადაწყვეტილება ეფუძნება ორგანიზაციის სტრატეგიული საკონსულტაციო ექსპერტთა ჯგუფის მიერ მომზადებულ შეფასებას.
დოკუმენტის მიხედვით, „დარწმუნების მაღალი ხარისხით“ მტკიცდება, რომ კორონავირუსის წინააღმდეგ ვაქცინის ორი დოზა 18-59 წლის გამოსაცდელ ჯგუფებში ეფექტიანია. მკვლევრები „დარწმუნების საშუალო ხარისხით“ ამბობენ, რომ აცრის შემდეგ სერიოზული გვერდითი მოვლენების რისკი დაბალია.
კვირის დასაწყისში გავრცელებული კვლევის მიხედვით, ვაქცინა 78,1%-ით ეფექტიანია კორონავირუსის ინფექციის გავრცელების წინააღმდეგ. იმისათვის, რომ ვაქცინას ავტორიზაცია მიენიჭოს, ის მინიმუმ 50%-იან ეფექტიანობას უნდა აჩვენებდეს.
WHO-ს საგანგებო გამოყენებისთვის ვაქცინის დამტკიცება ეროვნული მარეგულირებლებისთვის სიგნალია, რომ ვაქცინა უსაფრთხო და ეფექტიანია. ეს ასევე ნიშნავს, რომ ვაქცინის COVAX პლატფორმაში ჩართვა შესაძლებელია.
Sinopharm-ის კორონავირუსის ვაქცინა ტრადიციული მეთოდითაა დამზადებული. ის ინაქტივირებული ვაქცინაა. ორგანიზმში შეყვანის შემდეგ, ვირუსის დასუსტებული ვერსია ორგანიზმის იმუნურ რეაქციას იწვევს და ორგანიზმი ვირუსთან ბრძოლას სწავლობს.
საქართველოში Sinopharm-ით ვაქცინაცია 4 მაისს, "ჯანდაცვის მსოფლიო ორგანიზაციის" (WHO) გადაწყვეტილებამდე დაიწყო. 18 წლის ზემოთ ასაკის მოქალაქეებს აცრის გასაკეთებლად ვიზიტის დასაჯავშნად უნდა დარეგისტრირდნენ ვებგვერდზე booking.moh.gov.ge ან დარეკონ ტელეფონის ნომერზე 15 22.