რეფინანსირების განაკვეთის კლებას ლარმა გაუფასურებით უპასუხა

მას შემდეგ რაც ეროვნული ბანკის მონეტარული პოლიტიკის კომიტეტმა განაკვეთის 8%-მდე შემცირების გადაწყვეტილება მიღო, ლარი მცირედით გაუფასურდა და Bloomberg-ის სავაჭრო სისტემაში 2.73 ნიშნულს გასცდა დოლართან, მაშინ როცა ვაჭრობა დილას 2.7175 ნიშნულზე გაიხსნა. 

თავად მარეგულირებელმა გადაწყვეტილება იმით დაასაბუთა, რომ საქართველოში დაბალინფლაციური გარემო ნარჩუნდება, ხოლო ჯამური ინფლაცია კვლავ ჩამორჩება მიზნობრივ 3%-იან მაჩვენებლს - აპრილის წლიური ინფლაცია 1.5% იყო, ხოლო საბაზო ინფლაცია - 2.3%.

მიუხედავად ამისა, ეროვნული ბანკი აღიარებს, რომ გაურკვევლობა იმატებს და ინფლაციური რისკებიც გაზრდილია, მით უმეტეს იმ ფონზე, როცა გასული თვეების განმავლობაში მის მიერვე ჩატარებული გამოკითხვა ინფლაციური მოლოდინების ზრდას აჩვენებს.

კერძოდ, წლის დასაწყისიდან მოყოლებული იზრდება იმ ბიზნესების წილი ვინც მომდევნო ერთ წელში ფასების 8%-ზე მეტად ზრდას ელის. სამაგიეროდ, შემცირებულია იმ კომპანიების რიცხვი, რომლებიც მომდევნო ერთ წელში ფასების ზრდას 0%-თან ახლოს და 6-8%-ის ფარგლებში ელოდნენ. ასევე, იანვრიდან მზარდი ტენდენციით ხასიათდება გამოკითხული კომპანიების ის სეგმენტი, რომელიც საკუთარ პროდუქციაზე ფასების ზრდას 8%-ზე მეტად და 6-8%-ის ფარგლებში ვარაუდობს. სანაცვლოდ კი, სულ უფრო ნაკლები კომპანია ამბობს, რომ მომდევნო ერთ წელში საკუთარ პროდუქციაზე ფასების ზრდას 2-4%-ის ან 4-6%-ის ფარგლებში გეგმავდნენ.