ევროკავშირის ქვეყნებსა და ევროპარლამენტს შორის მოლაპარაკებების შედეგად 10 მარტს დაიდო შეთანხმება, რომლის მიხედვითაც 2030 წლისთვის ევროკავშირის მიერ ენერგიის მოხმარება 11.7%-ით უნდა შემცირდეს.
მიზნის მისაღწევად წევრ სახელმწიფოებს მოუწევთ საცხოვრებელი შენობების განახლება. ევროპული შენობების უმრავლესობა წიაღისეული საწვავით თბება, ხოლო გაერთიანების მთავარი მიზანი კლიმატური ცვლილებების წინააღმდეგ საბრძოლველად ძალისხმევის გაძლიერებაა. ერთ-ერთი წამყვანი მომლაპარაკებლის თქმით, “კლიმატის სასარგებლოდ და პუტინის წინააღმდეგ ეს იქნება რეალური ცვლილება”.
მიუხედავად დასახული მიზნისა, ევროპარლამენტი უფრო მეტს მოელოდა და ენერგიის საბოლოო მოხმარების 14%-იანი კლებისთვის იბრძოდა, თუმცა წევრ სახელმწიფოებს მოხმარების მხოლოდ 9%-ით შემცირება სურდათ. 9%-იანი კლება იყო ევროკავშირის თავდაპირველი, 2021 წლის ინიციატივა, რომელიც უკრაინაში რუსეთის შეჭრის შემდეგ 11.7%-მდე გაიზარდა.
ამჟამინდელი ინიციატივა წინგადადგმული ნაბიჯია, რომელიც “აუმჯობესებს ენერგოეფექტურობის მიმდინარე დირექტივას, თუმცა არა იმდენად, რამდენადაც იგი REPowerEU-ს მიზნების მისაღწევადაა საჭირო”, - განაცხადა არიანა ვიტალიმ, ენერგიის დაზოგვისთვის მომუშავე არაკომერციული კოალიციის გენერალურმა მდივანმა. იგი გულისხმობს ევროკავშირის მიზნებს, სრულად შეწყვიტოს რუსული წიაღისეული საწვავის მოხმარება 2027 წლისთვის.