სტატისტიკის ეროვნული სამსახურის მონაცემებით, 2022 წლის დეკემბერში ადგილობრივი ბაზრისთვის წარმოებული სამრეწველო პროდუქციის მწარმოებელთა ფასების ინდექსი 2021 წლის ანალოგიურ პერიოდთან შედარებით, 8.2%-ით გაიზარდა.
2022 წლის დეკემბერში ადგილობრივი ბაზრისთვის წარმოებული სამრეწველო პროდუქციის მწარმოებელთა ფასების წლიური ცვლილება ასეთი იყო:
- სამთო-მოპოვებითი მრეწველობისა და კარიერების დამუშავების პროდუქცია - ფასების წლიური ზრდა 18.5%;
- დამამუშავებელი მრეწველობის პროდუქცია - ფასების წლიური ზრდა 10.1%;
- წყალმომარაგების, კანალიზაციის, ნარჩენების მართვით და რეკულტივირებით მომსახურების ჯგუფი - ფასების წლიური ზრდა 1.8%;
- ელექტროენერგიის, აირის, ორთქლისა და კონდიცირებული ჰაერის ჯგუფი - ფასების წლიური კლება 4.4%.
რაც შეეხება სამრეწველო პროდუქციის მწარმოებელთა ფასების ინდექსს, საქსტატის თანახმად, ის დეკემბერში წლიურად 0.1%-ითაა გაზრდილი.
კვლევამ აჩვენა, რომ 2022 წლის დეკემბერში, 2021 წლის ანალოგიურ პერიოდთან შედარებით, 11.8%-ით გაიზარდა დროებითი განთავსების საშუალებებით და საკვების უზრუნველყოფით მომსახურებაზე მწარმოებელთა ფასების ინდექსი. საკვებისა და სასმელების მიწოდებით მომსახურების ფასებმა 16.2%-ით მოიმატა, ხოლო დროებითი განთავსების საშუალებებით მომსახურების ფასებმა - 8.4%-ით.
საქსტატის მონაცემებით, გასული წლის დეკემბერში სატრანსპორტო და სასაწყობო მომსახურებაზე მწარმოებელთა ფასების ინდექსი წლიურად 1.3%-ით გაიზარდა. ფასების 2.8%-იანი მატება დაფიქსირდა სახმელეთო ტრანსპორტის მომსახურებისა და მილსადენებით ტრანსპორტირების მომსახურების ჯგუფზე. ხოლო, საჰაერო ტრანსპორტის მომსახურებაზე ფასები შემცირდა 2.1%-ით, წყლის ტრანსპორტის მომსახურებაზე - 2.9%-ით, დასაწყობებასა და დამხმარე სატრანსპორტო მომსახურებაზე კი - 10.7%-ით.
დეკემბერში, წლიურად 0.5%-ით შემცირდა სატელეკომუნიკაციო მომსახურების მწარმოებელთა ფასების ჯამური ინდექსი. სადენიან სატელეკომუნიკაციო მომსახურებაზე ფასები შემცირდა 1.2%-ით, ხოლო თანამგზავრული კავშირგაბმულობის მომსახურებაზე ფასები გაიზარდა 16.7%-ით.
აღსანიშნავია, რომ შემცირდა როგორც ექსპორტის, ისე იმპორტის ფასების ინდექსი. დეკემბერში, 2021 წლის შესაბამის პერიოდთან შედარებით, ექსპორტის ფასების ინდექსმა 14.3%-ით იკლო, იმპორტის კი - 2.5%-ით.