ილონ მასკი ვარაუდობს, რომ რეცესია, შესაძლოა, 2024 წლის გაზაფხულამდე გაგრძელდეს, რაც გარკვეულწილად აისახება ევროპასა და ჩინეთში ელექტრომობილების მოთხოვნის შემცირებაზე.
ამ განცხადებიდან ერთი დღის შემდეგ, ხუთშაბათს, ელექტრომობილების მწარმოებლის აქციები 6,6%-ით დაეცა და $207.28 შეადგინა.
მასკმა ანალიტიკოსებთან საუბრისას განაცხადა, რომ მიმდინარე კვარტალში ელექტრომობილებზე "შესანიშნავი მოთხოვნაა", თუმცა შეზღუდული სატრანსპორტო შესაძლებლობების გამო, ის წლიურ გეგმას მაინც ჩამორჩება.
ბოლო კვარტალში Tesla-მ მომხმარებელს რეკორდული რაოდენობის - 343,830 ავტომობილი მიაწოდა, თუმცა აღნიშნული მაჩვენებელი მაინც ნაკლებია ანალიტიკოსების პროგნოზირებულ - 359,162 ავტომობილზე, რაც ინვესტორებისთვის უარყოფითი სიგნალია.
მიწოდების პრობლემა პირდაპირ კავშირშია ჩინეთში პანდემიის გამო, გამოცხადებულ რეგულაციებთან და ევროპაში მიმდინარე კრიზისთან.
Tesla-ს აქციებმა მიმდინარე წელს ღირებულების მესამედზე მეტი დაკარგა. ხუთშაბათს კი ეს მაჩვენებელი 9%-ით დაეცა და 16-თვიან მინიმუმს მიაღწია.