IMF მსოფლიო ეკონომიკის ზრდის პროგნოზს მესამედ ამცირებს

JOHANNES CHRISTO/Reuters

საერთაშორისო სავალუტო ფონდმა (IMF) შეამცირა გლობალური ეკონომიკის ზრდის პროგნოზი მიმდინარე და მომავალი წლისთვის. IMF აღნიშნავს, რომ გლობალური ეკონომიკა შესაძლოა მალე სრული რეცესიის ზღვარზე აღმოჩნდეს.

გლობალური ეკონომიკური ზრდა სავარაუდოდ შენელდება 3.2%-მდე მიმდინარე წელს, რაც ჩამორჩება აპრილის 3.6%-იან და იანვრის 4.4%-იან პროგნოზს.

ინფლაციის შესაჩერებლად რეფინანსირების განაკვეთების ზრდის სერია სავარაუდოდ 2023 წელსაც გაგრძელდება და გლობალური გამომუშავების ზრდას 2.9%-მდე შეანელებს.

მიუხედავად იმისა, რომ IMF კვლავ ხედავს პოზიტიურ ზრდას, ეს რეცესიის მზარდ შეშფოთებას არ შეამსუბუქებს, რადგან ფასების ზრდა ანადგურებს შემოსავლებს, დანაზოგებსა და მოგებას.

“პერსპექტივა მნიშვნელოვნად გაუარესდა აპრილიდან. მსოფლიო შეიძლება მალე აღმოჩნდეს გლობალური რეცესიის ზღვარზე, ბოლო რეცესიის შემდეგ მხოლოდ ორი წლის შემდეგ”, - განაცხადა სავალუტო ფონდის მთავარმა ეკონომისტმა პიერ-ოლივიე გურინშამ.

სამომხმარებლო ფასები მუდმივად იზრდებოდა იმაზე სწრაფად, ვიდრე მოსალოდნელი იყო. ფონდი ხედავს ინფლაციის ზრდას მიმდინარე წელს, რადგან საკვებისა და ენერგიის მაღალი ფასები შერწყმულია მიწოდებისა და მოთხოვნის მუდმივ დისბალანსთან. ის ახლა პროგნოზირებს მსოფლიო სამომხმარებლო ფასების ზრდას 8.3%-ით, რაც ყველაზე დიდი ნახტომია 1996 წლის შემდეგ. აპრილის შეფასება 7.4% იყო.

ფონდის თქმით, აპრილის მსოფლიო ეკონომიკურ პერსპექტივაში ასახული რისკები მატერიალიზდება. ასეთი საფრთხეები მოიცავს უკრაინაში ომის, რუსეთის წინააღმდეგ სანქციების ესკალაციას, ჩინეთში მოსალოდნელზე მკვეთრ შენელებას, Covid-19-ის ახალ აფეთქებას და ინფლაციის ტალღას, რომელიც აიძულებს ცენტრალურ ბანკებს, გაზარდონ საპროცენტო განაკვეთები.

მრავალ შიშს შორის არის რუსეთიდან ევროპული გაზის იმპორტის “უეცარი შეჩერების” შესაძლებლობა ომის, ინფლაციის და ჩინეთის ქონების კრიზისის შემდგომი ესკალაციის გამო.

ყველაზე მეტად აშშ-ის ზრდის პროგნოზი შემცირდა. სავალუტო ფონდმა ის 1,4 პროცენტული პუნქტით შეამცირა აპრილის 2,3%-დან, მიმდინარე წლის დასაწყისში სუსტი ზრდის, შინამეურნეობების მსყიდველობითი უნარის შემცირებისა და მონეტარული პოლიტიკის გამკაცრების გამო. საერთაშორისო სავალუტო ფონდის პროგნოზის თანახმად, 2023 წლის მეოთხე კვარტალში 0,6%-იანი წლიური ზრდის პროგნოზი “გაართულებს რეცესიის თავიდან აცილებას”.

ფონდმა შეამცირა ჩინეთის ზრდის პროგნოზი 1,1 პროცენტული პუნქტით 3,3%-მდე, რადგან ქვეყნის ეკონომიკური ვარდნა გაღრმავდება და მოგზაურობის შეზღუდვები მოქმედებს, რათა შეჩერდეს Covid-19-ის გავრცელება. ეს აფერხებს ოპერაციებს და აძლიერებს ზეწოლას გადატვირთულ მიწოდების ჯაჭვებზე.

სავალუტო ფონდის განცხადებით, მონეტარული პოლიტიკის გამკაცრებით ინფლაციის შეკავება ოფიციალური პირებისთვის მთავარი პრიორიტეტი უნდა იყოს, რაც “გარდაუვლად გამოიწვევს რეალურ ეკონომიკურ ხარჯებს, მაგრამ დაგვიანება მხოლოდ გაამწვავებს მათ.

განვითარებადი ბაზრებისა და ქვეყნების ვალი ათწლეულების განმავლობაში უმაღლეს დონეზეა. გლობალური სესხის ხარჯების ზრდა და გაცვლითი კურსის გაუფასურება ართულებს დოლარში დენომინირებული ვალის მომსახურებას. მსოფლიო ბანკი იუწყება, რომ მსოფლიოს 75 უღარიბესი ქვეყნიდან დაახლოებით 60% იმყოფება ან ემუქრება ვალის მომსახურების კრიზისი და ეს ვრცელდება საშუალო შემოსავლის ქვეყნებზეც.

საერთაშორისო სავალუტო ფონდი “უჩვეულოდ ძლიერ აქცენტს” აკეთებს რისკის შემცირების სცენარებზე.

“თუ დამატებითი პრობლემები დაატყდება გლობალურ ეკონომიკას, ეკონომიკური შედეგები კიდევ უფრო უარესი იქნება”, - ნათქვამია მოხსენებაში.

Bloomberg-ის ორიგინალური სტატიის ავტორები: ანა მონტეირო და ერიკ მარტინი