ფაუჩი: დროა, ცხოვრების ნორმალიზებისკენ წავიდეთ

Reuters

აშშ-ის ალერგიისა და ინფექციური დაავადებების ცენტრის დირექტორი, ენტონი ფაუჩი აცხადებს, რომ COVID-19-ის არსებული რისკების მიუხედავად, დროა შეერთებულმა შტატებმა ნორმალური ცხოვრებისკენ სწრაფვა დაიწყოს.

Reuters-თან ინტერვიუში ფაუჩიმ თქვა, რომ სახელმწიფოები რთული არჩევანის წინაშე დგანან, მათ უწევთ მოქალაქეები ინფექციებისგან დაიცვან და თან გაიაზრონ, რომ პანდემია მე-3 წელია აქტიურია და ხალხი ამით დაიღალა. 

"ამისთვის სრულყოფილი გამოსავალი არ არსებობს",- თქვა ფაუჩიმ, პრეზიდენტ ჯო ბაიდენის მთავარმა სამედიცინო მრჩეველმა და თეთრი სახლის COVID-19 რეაგირების ჯგუფის წევრმა.

მისივე თქმით, ყველაფერზე ერთბაშად უარის თქმა უგუნურება იქნება, მაგრამ ცხოვრების ნორმალიზებისკენ სვლა უნდა დაიწყოს. 

"ფსიქიკურ ჯანმრთელობაზე ზეგავლენა, ბავშვების განვითარებაზე გავლენა, გავლენა სკოლებზე - ეს აბალანსებს მცდელობას იყო ინფექციისგან სრულიად ხელუხლებელი და დაცული? მე არ მაქვს ამაზე სწორი პასუხი“,- თქვა მან. 

ჯანდაცვის ოფიციალურმა პირებმა ცოტა ხნის წინ განაცხადეს, რომ COVID-19-ზე რეაგირების ახალ სახელმძღვანელო წესებს ამზადებენ. ამას მოჰყვა რამდენიმე შტატის, მათ შორის ნიუ-ჯერსის, ნიუ-იორკის, კალიფორნიის, კონექტიკუტის, დელავერის და ორეგონის განცხადებები, რომ სკოლებსა და სხვა საჯარო დაწესებულებებში პირბადის ტარების ვალდებულება უახლოეს კვირებში გაუქმდება.