რუსეთის ჯარი უკრაინის საზღვართან მობილიზდა

GETTY IMAGES

უკრაინის საზღვრებთან რუსეთის ჯარის მობილიზება დაიწყო. ინფორმაცია ახალი სატელიტური ფოტოებით დასტურდება.

Maxar Technologies-ის მიერ გადაღებულ ფოტოებზე ჩანს ჯავშანტექნიკა, ტანკები და თვითმავალი არტილერიის კასეტური სახმელეთო ძალები ქალაქ იელნიას მიდამოში ბელარუსის საზღვართან. ქვედანაყოფები, რომლებმაც სექტემბრის ბოლოს რუსეთის სხვა ნაწილებიდან გადაადგილება დაიწყეს, ელიტარული გვარდიის სატანკო არმიას მოიცავს.

იმავდროულად, Jane's-ის მიერ ჩატარებულმა ახალმა ანალიზმა აჩვენა, რომ რუსეთის მე-4 დივიზიის აღჭურვილობა გადატანილია ბრიანსკისა და კურსკის მიმდებარე ტერიტორიებზე, უკრაინის ჩრდილოეთ საზღვართან. ქვედანაყოფები აღჭურვილია T-80U საბრძოლო ტანკებით და თვითმავალი საარტილერიო განყოფილებით. Jane's-ის ანალიზის მიხედვით, დანაყოფის მიზანია “განახორციელოს საბრძოლო ოპერაციები ყველა დონეზე, კონტრ-აჯანყებიდან მექანიზებულ ომამდე”.

ბოლო რამდენიმე თვის განმავლობაში მოსკოვსა და დასავლეთს შორის დაძაბულობამ იმატა, რადგან რუსეთის პრეზიდენტმა ვლადიმერ პუტინმა კვლავ დაიწყო საუბარი უკრაინისა და საქართველოს NATO-ში შესაძლო გაწევრიანების შესახებ, ხოლო შეერთებული შტატების თავდაცვის მდივანი ლოიდ ოსტინი ორივე ქვეყანას ოქტომბერში ეწვია.

კიევში ყოფნისას ოსტინს ჰკითხეს უკრაინის NATO-ში გაწევრიანების მცდელობის შესახებ. “უკრაინას უფლება აქვს განსაზღვროს მომავალი საგარეო პოლიტიკა”,- განაცხადა ოსტინმა და დასძინა, რომ აშშ “გააკეთებს ყველაფერს, რათა მხარი დაუჭიროს უკრაინის ძალისხმევას საკუთარი თავდაცვისუნარიანობის გასავითარებლად”.

თავდაცვის მდივნის განცხადებას რამდენიმე დღის შემდეგ უპასუხა პუტინმა და გააფრთხილა, რომ უკრაინის “NATO-ში ფორმალური გაწევრიანება შეიძლება არასოდეს მოხდეს, მაგრამ ტერიტორიაზე სამხედრო გაფართოება უკვე მიმდინარეობს და ეს ნამდვილად საფრთხეს უქმნის რუსეთის ფედერაციას”.

სატელიტური ფოტოები გადაღებულია კიევსა და კრემლს შორის მზარდი დაძაბულობის ფონზე. მიმდინარე წლის გაზაფხულზე, უკრაინის საზღვარზე რუსული ჯარების მობილიზებამ უკრაინის დედაქალაქსა და ვაშინგტონში შეშფოთება გამოიწვია. 

სამხედრო ძალების ნაწილი მოგვიანებით ბაზებზე დაბრუნდა, მაგრამ აღჭურვილობის დიდი ნაწილი ადგილზე დარჩა.

რუსეთი მწვავე დიპლომატიურ დაპირისპირებაშია NATO-სთან. გასულ თვეში, თავდაცვის მინისტრების ყოველწლიურ კონფერენციამდე რამდენიმე კვირით ადრე, ალიანსმა ჯაშუშობის ბრალდებით რვა რუსი დიპლომატი გააძევა. საპასუხოდ, რუსეთმა NATO-ს მისია დახურა.