Facebook-მა რუსეთიდან მართული ანტივაქსერული ქსელი წაშალა

Facebook-მა წაშალა ასობით ანგარიში, რომლებიც, რუსეთიდან მართულ ანტივაქსერული დეზინფორმაციის კამპანიაში იყვნენ ჩართული.

ქსელი ცდილობდა, გავლენიანი ადამიანები Covid-19-ის საწინააღმდეგო ვაქცინის შესახებ ყალბი ინფორმაციის გასავრცელებლად მიეზიდა. კომპანიის განმარტებით, კამპანია ინდოეთზე, ლათინურ ამერიკასა და აშშ-ზე იყო გამიზნული. 

"კოორდინირებული არაავთენტური ქცევის" შესახებ უახლეს ანგარიშში Facebook-ი აღნიშნავს, რომ ქსელი დაკავშირებულია გავლენიან მარკეტინგულ სააგენტო Fazze-თან, რომელიც რუსული კომპანიის AdNow-ის ნაწილია.

გასულ თვეს BBC-ის გამოძიებამ გაავრცელა ინფორმაცია, თუ როგორ სთავაზობდნენ ინფლუესერებს ფულს Pfizer-ის ვაქცინასთან დაკავშირებული ცრუ ინფორმაციის გასავრცელებლად.

Facebook-ის თანახმად, ეს იყო ქსელის მეორე მცდელობა, რომ შეელახა დასავლური ვაქცინების სანდოობა.

იგივე ქსელი 2020 წლის ნოემბრიდან ცდილობდა AstraZeneca-ს ვაქცინა წარმოეჩინა, როგორც საშიში პრეპარატი, რადგან მასში გამოყენებულია შიმპანზეს ადენოვირუსის მოდიფიცირებული ვერსია, რომელიც უსაფრთხოა და დიდი ხანია სხვადასხვა ვაქცინის შესაქმნელად გამოიყენება. 

იმ დროს, როცა ინდოეთის მთავრობა AstraZeneca-ს ვაქცინისთვის საგანგებო ავტორიზაციის მინიჭებას განიხილავდა, ქსელი მიზანმიმართულად ავრცელებდა მიმებს, სადაც ადამიანები ჩანაცვლებულები არიან მაიმუნებით. 

კამპანია აქტიურად იყენებდა Facebook-ის ყალბ ანგარიშებს, რომლებიც კომპანიის განმარტებით, შექმნილია პაკისტანსა და ბანგლადეშში. 

უმსხვილესი სოციალური ქსელის განცხადებით, გარე ჩარევის წინააღმდეგ მისი პოლიტიკის დარღვევის გამო, Facebook-ზე 65, ხოლო Instagram-ზე 243 ყალბი ანგარიში წაიშალა. 

Facebook-ის გარდა, დეზინფორმაციის გასავრცელებლად, ქსელი ასევე იყენებდა Reddit-ს და Medium–ს, ხოლო AstraZeneca-ს ვაქცინის უსაფრთხოების შესახებ პეტიციები გამოჩნდა change.org-ზე. 

Facebook-ის ანგარიშის მიხედვით, ბმულებს ინფლუენსერები Instagram-ზე იმავე ჰეშთეგების გამოყენებით აზიარებდნენ.

სოციალური ქსელის ადმინისტრაციის შეფასებით, დეზინფორმაციის ორივე ტალღა წარუმატებელი აღმოჩნდა, რადგან მრავალფეროვანი მეთოდების გამოყენების მიუხედავად, საზოგადოებისთვის მიმზიდველი არ გახდა. 

BBC წერს, რომ AdNow-ს მოსკოვის მთავარი ოფისიდან კომენტარი ვერ მოიპოვა, თუმცა ბრიტანეთში კომპანიის დირექტორის თქმით, Fazze დაიხურა. 

Facebook-ის თქმით, Fazze მის პლატფორმაზე დაიბლოკა.