"მსოფლიო ჯანდაცვის ორგანიზაციის" (WHO) ექსპერტებმა “ძალიან დაბალი ნდობა” გამოხატეს Sinopharm-ის მიერ მიწოდებული მონაცემების შესახებ, რაც ზოგიერთ პაციენტში სერიოზული გვერდითი მოვლენების განვითარების რისკს უკავშირდება, მაგრამ მთლიანობაში გამოხატულია ნდობა დაავადების პრევენციის შესაძლებლობის მიმართ. ინფორმაციას Reuters-ი შესაბამის დოკუმენტებზე დაყრდნობით ავრცელებს.
WHO-ს სპიკერის განცხადებით, აღნიშნული დოკუმენტი “ერთ-ერთი ყველაზე დიდი რესურსია” იმ რეკომენდაციებისთვის, რომლებიც, სავარაუდოდ, მიმდინარე კვირის ბოლომდე გამოქვეყნდება.
დოკუმენტი მოიცავს მონაცემებს ჩინეთში, ბაჰრეინში, ეგვიპტეში, იორდანიასა და არაბთა გაერთიანებულ საამიროებში ჩატარებული კლინიკური კვლევების მონაცემებზე.
დოკუმენტში ნათქვამია, რომ რამდენიმე ქვეყანაში ვაქცინის ორი დოზის ეფექტურობა მესამე ფაზის კლინიკურ კვლევებში 78.1% იყო, რაც მცირედით განსხვავდება ჩინეთის მიერ გავრცელებული მაჩვენებლისგან - 79,34%.
“დარწმუნებულნი ვართ, რომ ვაქცინის 2 დოზა ეფექტურია მოზრდილებში COVID19-ის თავიდან ასაცილებლად”, - ნათქვამია დოკუმენტში.
“ნაკლოვან მტკიცებულებებს” შორის მოყვანილია მონაცემები დაცვის ხანგრძლივობის, ორსულების და მოხუცების უსაფრთხოების შესახებ და ავტორიზაციის შემდეგ გვერდითი მოვლენების გამოვლენა/შეფასების მონიტორინგის თაობაზე.
“ჩვენ ძალიან დაბალი ნდობა გვაქვს იმ მტკიცებულებების ხარისხის მიმართ, რომლის თანახმად, 60 წლისა და უფროსი ასაკის მოსახლეობაში ვაქცინის ერთი ან ორი დოზის შემდეგ სერიოზული გვერდითი მოვლენების რისკი დაბალია”,- ნათქვამია დოკუმენტში.
მტკიცებულებების შეფასების დოკუმენტი WHO-ს ექსპერტთა სტრატეგიულმა მრჩეველთა ჯგუფმა (SAGE) მოამზადა. ექსპერტები განიხილავენ მტკიცებულებებს და ამზადებენ რეკომენდაციებს ვაქცინებთან დაკავშირებული პოლიტიკისა და დოზირების შესახებ.
WHO აღნიშნულ დოკუმენტზე დაყრდნობით განიხილავს ვაქცინის საგანგებო გამოყენებისთვის დამტკიცების მიზანშეწონილობას, რაც არა მხოლოდ გზას გაუხსნის მის გამოყენებას ვაქცინების გაზიარების გლობალურ პლატფორმაში, არამედ უზრუნველყოფს მნიშვნელოვან საერთაშორისო ავტორიზაციას ჩინეთში დამზადებული ვაქცინისთვის.