"ევროპის წამლის სააგენტომ" (EMA) კერძო ჩინური კომპანია Sinovac Life Sciences-ის კორონავირუსის საწინააღმდეგო ვაქცინის უსაფრთხოებისა და ხარისხის სტანდარტების განხილვა დაიწყო, რაც ევროკავშირში დამტკიცებისთვის გადადგმული პირველი მნიშვნელოვანი ნაბიჯია.
"სააგენტოს ადამიანის წამლების კომიტეტის შეფასება დაეყრდნობა კვლევებსა და მონაცემებს, რომლებიც მიუთითებენ, რომ ვაქცინა ხელს უწყობს ანტისხეულების გამომუშავებას, რომლებიც ებრძვიან კორონავირუსს და გვიცავენ დაავადებისგან",- ნათქვამია EMA-ს საიტზე გამოქვეყნებულ განცხადებაში.
სხვადასხვა ქვეყნის კვლევით, Sinovac-ის ეფექტიანობა 50%-დან 90%-მდე მერყეობს. ის 20-ზე მეტ ქვეყანაში გამოიყენება. მათ შორის, ავტორიზებულია თურქეთში, ბრაზილიაში, ჩინეთსა და ინდონეზიაში.
კიდევ ერთ ჩინურ ვაქცინასთან Sinopharm-თან ერთად, Sinovac-ს ამჟამად "ჯანდაცვის მსოფლიო ორგანიზაციაც" (WHO) განიხილავს. მისცემს თუ არა ორგანიზაცია მას ავტორიზაციას კვირის ბოლომდე გაირკვევა.
ჩინეთის მიერ საქართველოსთვის ნაჩუქარი Sinovac-ის 100 000 დოზა თბილისში გასულ კვირას ჩამოვიდა. თუმცა WHO-ს ავტორიზაციამდე ის ჯერჯერობით არ გამოიყენება.
Sinovac-ის ვაქცინა კორონავირუსის პირველი ჩინური ვაქცინაა, რომელსაც "ევროპის წამლის სააგენტო" განიხილავს. მის გარდა, EMA რუსული Sputnik V-ის, გერმანული CureVac-ისა და ამერიკული Novavax-ის ვაქცინებს სწავლობს.
Bloomberg-ის ორიგინალური სტატია