რუსეთმა გააპროტესტა ბრაზილიის ჯანმრთელობის მარეგულირებელი ორგანოს გადაწყვეტილება Sputnik ვაქცინის იმპორტის დაბლოკვის შესახებ და განაცხადა, რომ ბრაზილიის მხრიდან ვაქცინის უსაფრთხოების, ხარისხისა და ეფექტურობის შესახებ არ ჩატარებულა თანმიმდევრული და საიმედო კვლევა.
ბრაზილიის ჯანმრთელობის სამეთვალყურეო სააგენტოს ხუთკაციანმა საბჭომ (Anvisa) აღნიშნა, რომ დაადგინა ხარვეზები პრეპარატის კლინიკური კვლევების სამივე ფაზაში. განცხადებაში აგრეთვე ნათქვამია, რომ მათ ვერ შეძლო ვაქცინის ფარმაცევტული მასალების წყაროს დადგენა და რუსეთში ბოლოდროინდელი ინსპექტირების დროს არ ჰქონდათ წვდომა შესაბამის ლაბორატორიებთან.
Sputnik V-ის შემქმნელებმა უარყვეს დასკვნები, როგორც პოლიტიკურად მოტივირებული და თქვეს, რომ Anvisa-ზე ზეწოლა მოახდინეს აშშ-ის ოფიციალურმა ორგანოებმა, რუსული ვაქცინის დაბლოკვის მიზნით. მათ ასევე უარყვეს, რომ ბრაზილიის მარეგულირებლებს ეკრძალებოდათ საწარმოებში შესვლა, სადაც ბრაზილიისთვის განსაზღვრული პრეპარატები მზადდებოდა.
Anvisa-ს გადაწყვეტილებამ დაძაბულობა ბრაზილიაშიც გამოიწვია, სადაც ათეულობით რეგიონის გუბერნატორმა მოითხოვა რუსული ვაქცინის სწრაფი დამტკიცება.
ბრაზილიამ სრულად აცრა მოსახლეობის მხოლოდ 6%, ვაქცინების მიწოდების ტემპი მაისში 14.5 მილიონით შემცირდა და 32.4 მილიონი შეადგინა. ქვეყნის ჯანდაცვის მინისტრმა განაცხადა, რომ ჩინეთიდან მიწოდების შეფერხებამ შეიძლება მნიშვნელოვანი გავლენა იქონიოს იმუნიზაციის კამპანიაზე.
Sputnik-ის ვაქცინა კვლავ განხილვის სტადიაშია ევროკავშირის მიერ. ვაქცინა დამტკიცებულია 61 ქვეყანაში და პოპულარულია მთელ ლათინურ ამერიკაში, პანდემიით ერთ-ერთ ყველაზე დაზარალებულ რეგიონში.
დოზების სტაბილური მიწოდების უზრუნველსაყოფად, ბოლოდროინდელი სწრაფვის მიუხედავად, Anvisa-ს დირექტორმა, ალექსი მაჩადო კამპოსმა განაცხადა, რომ Sputnik-ის პოტენციური საფრთხეები გადაწონის მის სარგებელს. Anvisa-მ ასევე აღნიშნა, რომ ვაქცინის წარმოებაში აღმოაჩინა შემაშფოთებელი ინფორმაცია.
”უჯრედები, სადაც ადენოვირუსები წარმოიქმნება, იძლევა მათი გამრავლების საშუალებას”,- თქვა მან და დასძინა, რომ ამან შეიძლება გამოიწვიოს ახალი ინფექციები, ან გარდაცვალებაც კი.
რუსმა ფარმაცევტებმა განაცხადეს, რომ 26 აპრილს Anvisa-სთან შეხვედრაზე მათ ყველა ტექნიკურ საკითხს უპასუხეს ”იმის საჩვენებლად, რომ ამ ბრალდებებს არანაირი სამეცნიერო საფუძველი არ აქვს და მათ სერიოზულად ვერ განიხილავენ სამეცნიერო წრეებში და საერთაშორისო მარეგულირებელ ორგანოებში”.
კვირის დასაწყისში, გერმანიის კანცლერმა ანგელა მერკელმა განაცხადა, რომ ევროპის სამედიცინო სააგენტოს ჯერ კიდევ არ მიუღია საკმარისი ინფორმაცია Sputnik-ის შესახებ, შესყიდვების დამტკიცების მიზნით.
ბრაზილია იყენებს ჩინურ Sinovac-ს და AstraZeneca-ს. სააგენტომ ასევე დაამტკიცა Pfizer, J&J და Covishield-ის მიერ წარმოებული ვაქცინები, რომელსაც ინდოეთი აწარმოებს.
Bloomberg-ის ორიგინალური სტატიის ავტორები: ენდრიუ როსატი და ჯეიკ რუდნიცკი