უმეტესობა ჩვენგანისთვის დილა ფინჯანი ყავით იწყება. ეს არის გემო, რომელიც გვაფხიზლებს და რეალობაში გვაბრუნებს. ოდესმე დაფიქრებულხარ, რა გზას გადის ყავის მარცვლები, ვიდრე საუზმეზე შენს ფინჯანში მოხვდება? ალბათ, არ გაგიკვირდება, თუ გეტყვით, რომ ეს საკმაოდ ხანგრძლივი და საინტერესო პროცესია.
თუ შენი ცნობისმოყვარეობა გავაღვიძეთ, შეგიძლია, გამოგვყვე და ჩვენთან ერთად იმოგზაურო. გეზს ყავის პლანტაციებიდან ავიღებთ. საბოლოო ლოკაცია კი შენთვის ყველაზე ნაცნობი ადგილი, შენივე სამზარეულო იქნება.
ყავის წარმოშობის ისტორია
როგორც იცი, ყავის ძირითადი მწარმოებელი ქვეყნებია - ეთიოპია, კოლუმბია, ბრაზილია და ვიეტნამი. მოსავლის მოსაყვანად აუცილებელია ეკვატორული კლიმატი. პლანტაციებში მომუშავე ფერმერები ნარგავებზე საგულდაგულოდ ზრუნავენ და უფრთხილდებიან. ეს შრომატევადი საქმე არამარტო დროს, სპეციალურ ცოდნასაც მოითხოვს.
გარემო პირობების მიხედვით, სხვადასხვა რეგიონში განსხვავებული ტიპის ყავის მარცვლები მოჰყავთ. ამის მიხედვით გამოარჩევენ არაბიკასა და რობუსტას. როგორც წესი, მარცვლების დათესვიდან ნაყოფის გამოღებამდე 3 - 4 წელია საჭირო. ამის შემდეგ კი ფერმერები მოსავალს ყოველწლიურად იღებენ.
როგორ ირჩევა მარცვლები
მოსავლის აღების სეზონი ადგილების მიხედვით განსხვავდება. ზოგან ეს წელიწადში მხოლოდ ერთხელ ხდება, ზოგან - რამდენჯერმე. დროს ამ შემთხვევაში გადამწყვეტი მნიშვნელობა აქვს. ნაყოფი არც მკვახე უნდა იყოს და არც გადამწიფებული. ამიტომ ბევრი ფერმერი მოსავლის აღებისას კვლავ ხელით მუშაობას ამჯობინებს. საგანგებოდ შერჩეული ყავის მარცვლები შემდეგ უნდა გამოშრეს და ფერმენტირდეს. ამისთვის მათ მზეზე ალაგებენ.
ყავის ექსპორტი
მოსახალად გამზადებული მარცვლები პლანტაციებიდან შესაბამის საწარმოებამდე გადააქვთ. ექსპორტის დროს მნიშვნელოვანია მარცვლები ოპტიმალურ პირობებში იყოს შენახული. ამას დიდი გავლენა აქვს ყავის გემოსა და არომატზე. გადაზიდვა კონტეინერების საშუალებით ხდება. გასათვალისწინებელი ფაქტორია ტრანსპორტირების დროც, რათა მაღაზიის დახლებამდე პროდუქტმა ახალ მდგომარეობაში მიაღწიოს.
როგორ იხალება ყავა
სამართლიანი იქნება, თუ ვიტყვით, რომ მოხალვა მთელ ამ პროცესში ყველაზე მნიშვნელოვანი და საპასუხისმგებლო ეტაპია. მოხალვის ტექნიკა და მეთოდი განსაზღვრავს ყავის გემოსა და არომატს. მარცვლებს განსხვავებულ ტემპერატურაზე ხალავენ. არომატი დამოკიდებულია მოხალვის დროზეც. ამის მიხედვით, სრულიად განსხვავებულ, მრავალფეროვან გემოებს ვიღებთ.
ყავის მოხალვა ერთგვარი ხელოვნებაა. მისი შემოქმედი განსაზღვრავს მარცვლები შედარებით ძლიერი კონსისტენციის სითხედ იქცევა, თუ მსუბუქ, სასიამოვნო არომატის სასმელად.
გზა მაღაზიის დახლებამდე
გამზადებული ყავის მარცვლები შესაბამისად იფუთება. დაფასოებული პროდუქტი კი საბოლოოდ მაღაზიის დახლებზე აღმოჩნდება. იმის გათვალისწინებით, რომ მომხმარებელი შეფუთვას დიდ მნიშვნელობას ანიჭებს, ყავის მიმწოდებელი კომპანიები დიზაინს განსაკუთრებულ ყურადღებას აქცევენ. გემოვნებისამებრ, შენც საყვარელ ყავას ირჩევ და მაშინვე ავსებ მარაგს, რათა შენი დილა რჩეული არომატით დაიწყო.
საბოლოო დანიშნულების ადგილი
როგორც უკვე აღვნიშნეთ, საბოლოო დანიშნულების ადგილი შენივე სამზარეულოა, სადაც, სავარაუდოდ, ყავისთვის ცალკე კუთხე გაქვს გამოყოფილი. ყოველ დილით იღვიძებ და პირველი, რაც გახსენდება, არომატული სასმლის პირველი ყლუპია, რომელიც ენერგიით დაგმუხტავს და სამუშაო დღისთვის მოგამზადებს. აპარატს რთავ და შენი საყვარელი მარცვლებისგან ფინჯან ყავას იმზადებ. ეს ის გემოა, რომელსაც შეუძლია წამში პოზიტიურად განგაწყოს.
შეჯამება
იმისთვის, რომ საგანგებოდ შერჩეული, უმაღლესი ხარისხის ყავის მარცვლები შენს ფინჯანში მოხვედრილიყო, უამრავმა ადამიანმა იზრუნა. ეს არის წლების ნამუშევარი და დახვეწილი ოსტატობის შედეგი. ამ მარცვლებმა ხანგრძლივი გზა გამოიარეს და მათ თავისი ისტორია აქვთ. როცა მათგან მომზადებულ ყავას აგემოვნებ, ამ ისტორიას შეიგრძნობ და შენც მისი ნაწილი ხდები.
(R)