ივანიშვილის "ქართუმ" შპს "სულაჟერში" ხიდაშელის პარტნიორობა შეწყვიტა

ბიძინა ივანიშვილის საქველმოქმედო ფონდი "ქართუ" შპს "სულაჟერში" ბიზნესმენ დავით ხიდაშელის პარტნიორი აღარ არის. 

საჯარო რეესტრის მონაცემებით, ამჟამად კომპანიის 10%-ს ფლობს შპს ბიო-სამედიცინო კორპორაცია, რომლის დირექტორი და 100%-იანი წილის მფლობელი დავით ხიდაშელია. "სულაჟერის" 90%-იანი წილის მფლობელი კი ალექსანდრე თავართქილაძეა. 

კომპანიის მეწილეების მონაცემებში ცვლილება 2023 წლის 17 ოქტომბერს შევიდა. 

გასული წლის მონაცემებით, "სულაჟერის" 35-35%-ს საქველმოქმედო ფონდი "ქართუ" და შპს ბიო-სამედიცინო კორპორაცია ინაწილებდნენ, 30%-ს კი ალექსანდრე თავართქილაძის შპს ჰერბსვისდომ ფლობდა. 

"სულაჟერი" ფარმაცევტული კომპანიაა, რომელიც კოვიდის საწინააღმდეგო პრეპარატის წარმოებისთვის შეიქმნა.