Zara-ს მფლობელის უძრავი ქონების ღირებულება $20 მილიარდამდე გაიზარდა

Zara-ს მილიარდერი მფლობელის, ამანსიო ორტეგას უძრავი ქონების საბაზრო ღირებულება გასულ წელს 19%-ით ანუ 2,8 მილიარდი ევროთი გაიზარდა და 18 მილიარდ ევროს გადააჭარბა. 

მილიარდერის აქტივების მმართველი კომპანიის, Pontegadea-ს განცხადებით, ორტეგას საკუთრებაში არსებული უძრავი ქონების პორტფელი 2022 წელს 18,1 მილიარდ ევროდ ($20,1 მილიარდი) შეფასდა, 2021 წელს ის 15,3 მილიარდ ევროს შეადგენდა.

მოდის გიგანტის, Inditex-ის უდიდესი წილის მეპატრონე ორტეგას უძრავი ქონების პორტფელი ევროპის "სუპერ მდიდარ" ადამიანებს შორის ყველაზე დიდია. 

Pontegadea-მა ბოლო დროს თავისი პორტფელი ლოგისტიკურ ცენტრებში ინვესტიციებით და აშშ-ში ძვირადღირებულ შენობებში უძრავი ქონების შეძენით გაზარდა. ესპანეთის უმდიდრესმა ადამიანმა, წლების განმავლობაში, ძირითადად კომერციულ უძრავ ქონებაზე ფოკუსირების შემდეგ, გასულ წელს აშშ-ს მასშტაბით საწყობებში დაახლოებით $1 მილიარდი დახარჯა.

2022 წელს ორტეგამ ასევე იყიდა ორი საცხოვრებელი სახლი: 64-სართულიანი ცათამბჯენი სიეტლში და საცხოვრებელი კორპუსი ნიუ-იორკის ჰოლანდიის ქუჩაზე.

Pontegadea, რომელიც წლების განმავლობაში ძირითადად უძრავ ქონებაზე იყო ორიენტირებული, ამჟამად დაინტერესებულია ენერგეტიკულ კომპანიებითაც. ის ყიდულობს მზის ელექტროსადგურების, ელექტრო ქსელის ოპერატორებისა და ქარის ელექტროსადგურების აქციებს.

Bloomberg Billionaires Index-ის მიხედვით, ორტეგას ქონება $76,5 მილიარდს შეადგენს.