„საზოგადოება და ბანკების“ მიერ გავრცელებული ინფორმაციის თანახმად, საქართველოში, ბოლო დროს გახშირდა კიბერთაღლითობის შემთხვევები ახალი სქემით.
ორგანიზაციის განცხადებით, ბანკის მომხმარებლებს ეგზავნებათ SMS-ი, რომელიც მათ სხვადასხვა სერვისის გადახდის დავალიანებას ატყობინებს, მაგალითად: NETFLIX-ის ან საქართველოს ფოსტის სერვისის გადასახადს.
„მომხმარებელი გადადის ყალბ ბმულზე, შეჰყავს პირადი ინფორმაცია და ეხვევა მახეში, რადგან ბარათის მონაცემების გაზიარებისას კიბერთაღლითი მონაცემებს იპარავს. ამის შემდეგ ის მოპარული ბარათის მონაცემებს ამატებს Apple/Google Pay wallet-ში, რა დროსაც მომხმარებელს ეგზავნება SMS კოდი ოპერაციის დადასტურებისთვის. სამწუხაროდ მომხმარებელი ამ კოდსაც აზიარებს. კიბერდამნაშავე კი ვოლეტში დამატებული ბარათით ახორციელებს გადახდებს პოს ტერმინალზე ან ელექტრონულ კომერციაში, ვებგვერდზე გადახდით“, - აღნიშნულია „საზოგადოება და ბანკების“ მიერ გავრცელებულ განცხადებაში.
ორგანიზაცია მოქალაქეებს შემდეგ რეკომენდაციებს აძლევს:
- არ გადავიდნენ საეჭვო ბმულზე;
- დააკვირდნენ ბმულს, როგორც წესი, ოფიციალური აპლიკაციის/ვებგვერდის სიმბოლოებში განსხვავებაა;
- თავად აკრიფონ მისამართი და დააკვირდნენ ბოქლომს (უნდა იყოს დახურულ მდგომარეობაში);
- არასდროს გაუზიარონ სხვა პიროვნებას პირადი საბანკო მონაცემები და ერთჯერადი კოდი.