ცენტრალური აზიის ეკონომიკები უკრაინაში ომის გავლენით იზრდება

უკრაინაში მიმდინარე ომის გავლენით რუსეთიდან მოსახლეობისა და კომპანიების დიდი ნაწილი ცენტრალური აზიის ქვეყნებში გადიან, რაც დადებითად აისახება აღნიშნულ რეგიონში ქვეყნების ეკონომიკურ ზრდაზე. 

ევროპის რეკონსტრუქციისა და განვითარების ბანკი (EBRD) მიმდინარე და მომდევნო წლებისთვის ცენტრალური აზიის ეკონომიკის 5%-იან ზრდას პროგნოზირებს. EBRD-ის თანახმად, ყაზახეთის ეკონომიკა წელს 3.9%-ით გაიზრდება, ხოლო ყირგიზეთის ეკონომიკა - 7%-ით. 

კომპანიების ნაწილი, რომლებიც რუსეთს ტოვებენ, ცენტრალურ აზიაში გადადიან. გარდა ამისა, ცენტრალური აზიის ეკონომიკაზე მნიშვნელოვან პოზიტიურ გავლენას ახდენს რუსულ ექსპორტზე დაწესებული სავაჭრო შეზღუდვები. EBRD-ის მთავარი ეკონომისტის, ბეატა იავორჩიკის თქმით, ამჟამად ყაზახეთში დაახლოებით 15 500 ბიზნესს რუსული კაპიტალი აქვს, რაც გაორმაგებული მაჩვენებელია წინა წელთან შედარებით. რუსული კაპიტალის მატება შეიმჩნევა ყირგიზეთშიც. 

“ეს ქვეყნები სარგებლობენ რუსული კაპიტალის შედინებით. რუსებს თავიანთი დანაზოგები საზღვარგარეთ გადააქვთ, ხოლო კომპანიები ქვეყნიდან საერთოდ გადიან და სხვა ქვეყნებში აგრძელებენ მუშაობას”, - აღნიშნა იავორჩიკიმ ინტერვიუში.