ილონ მასკი Twitter-ის CEO აღარ იქნება

მილიარდერი ილონ მასკი Twitter-ის აღმასრულებელი დირექტორი აღარ იქნება. მისი თქმით, ამ თანამდებობაზე შემცვლელი შეარჩია. 

მასკს ახალი დირექტორის სახელი არ გაუმჟღავნებია, თუმცა აღნიშნა, რომ ის პლატფორმის მართვას დაახლოებით 6 კვირაში შეუდგება. 

ამასთან, მასკი აღნიშნავს, რომ კომპანიაში ის აღმასრულებელი თავმჯდომარისა და CTO-ს როლს შეასრულებს და ზედამხედველობას გაუწევს პროგრამულ უზრუნველყოფასა და სისტემების გამართულობას.

The Wall Sreet Journal-ის თანახმად, Twitter-ის ახალი აღმასრულებელი დირექტორი შესაძლოა, NBCUniversal-ის სარეკლამო გაყიდვების განყოფილების ხელმძღვანელი ლინდა იაკარინო გახდეს.

ილონ მასკმა Twitter-ის ყიდვის $44-მილიარდიანი გარიგება გასული წლის ოქტომბრის ბოლოს დაასრულა, რის შემდეგაც კომპანიის აღმასრულებელი დირექტორი გახდა. მასკის მიერ მიღებულ გადაწყვეტილებებს საზოგადოების და ბიზნესის კრიტიკა არაერთხელ მოჰყვა.