საფრანგეთი საჯარო მოხელეებს სამსახურებრივ ტელეფონებზე სოციალური მედიის პლატფორმების, სათამაშო და ვიდეოსტრიმინგის აპლიკაციების გამოყენებას უკრძალავს. გადაწყვეტილება კიბერუსაფრთხოებისა და კონფიდენციალურობის დაცვით აიხსნება.
აკრძალული აპლიკაციების სიაში ჩინურ TikTok-თან ერთად, Candy Crush და Netflix მოხვდა.
„ამ გასართობ აპლიკაციებში არ არის დაცული კიბერუსაფრთხოების საკმარისი ხარისხი იმისათვის, რომ ისინი ადმინისტრაციის ციფრულ მოწყობილობებზე გამოიყენებოდეს. აკრძალვა ასევე შეეხება TikTok-ს, ასევე CandyCrush-ს და Netflix-ს“, - თქვა ციფრულმა მინისტრმა ჟან-ნოელ ბარომ.
მისი თქმით, გამონაკლისი შეიძლება იყოს "ინსტიტუციური კომუნიკაციების" მიზნები.
საფრანგეთის ამ ნაბიჯს წინ უსწრებდა ევროკავშირის ინსტიტუტებისა და დასავლეთის ქვეყნების მიერ TikTok-ის გამოყენების შეზღუდვა.
მარტის დასაწყისში მთავრობის პრესსპიკერმა ოლივიე ვერანმა განაცხადა, რომ საფრანგეთის მინისტრებსა და პრეზიდენტს ემანუელ მაკრონს სამსახურებრივ ტელეფონებზე სოციალური მედიის აპლიკაციების, Instagram-სა და TikTok-ის ჩამოტვირთვა არ შეუძლიათ.
მიმდინარე კვირის დასაწყისში, საფრანგეთის ეროვნული ასამბლეის მაღალჩინოსნებმა მოსახლეობას მოუწოდეს, რომ „შეზღუდონ“ სოციალური მედიის აპლიკაციებისა და საკომუნიკაციო სერვისების გამოყენება, როგორიცაა Instagram, TikTok, Snap და Signal.