recov.ge-ს მონაცემებით, 2023 წლის თებერვალში თბილისში 3 421 ბინა გაიყიდა, რაც გასული წლის ანალოგიურ პერიოდთან შედარებით, 5%-ით გაზრდილი მაჩვენებელია. ერთ წელში ბაზრის ზომამ 21%-ით მოიმატა და 190 მლნ დოლარი შეადგინა.
წინა თვეში, ახალაშენებულ პრემიუმ სეგმენტის ბინებზე მოთხოვნა 143%-ით გაიზარდა, მედიუმ სეგმენტში კი მაჩვენებლის 53%-იანი ზრდა დაფიქსირდა. რაც შეეხება ეკონომ სეგმენტს, ტრანზაქციების რაოდენობა 9%-ით შემცირდა.
recov.ge-ს თანახმად, ახალ პროექტებში ტრანზაქციების 12%-იანი ზრდა დაფიქსირდა, ძველ პროექტებში კი მაჩვენებელი წლიურად 7%-ით შემცირდა.
რაც შეეხება ფასს, წინა თვეში ახალაშენებული ბინების საშუალო შეწონილი გასაყიდი ფასი ფართო ცენტრში 16%-ით გაიზარდა, გარეუბნებში - 12%-ით, ქალაქის ცენტრში კი - 11%-ით.
თებერვალში ძველი ბინების საშუალო შეწონილმა გასაყიდმა ფასმა 9%-ით მოიმატა გარეუბნებში, ქალაქის ცენტრსა და ფართო ცენტრში კი 2% და 1%-იანი ზრდა დაფიქსირდა.