საქართველოში მშპ ერთ სულზე 6 671.9 დოლარია - საქსტატი

2022 წლის წინასწარი მონაცემებით საქართველოში მთლიანი შიდა პროდუქტის მოცულობა მიმდინარე ფასებში 71 754.2 მლნ. ლარს გაუტოლდა, რაც 19.6%-ით აღემატება წინა წლის შესაბამის მაჩვენებელს. ერთ სულ მოსახლეზე მთლიანი შიდა პროდუქტის მაჩვენებელმა კი 6 671.9 დოლარი შეადგინა.

საქსტატის მონაცემებით, გასულ წელს ქვეყნის ეკონომიკა 10.1%-ით გაიზარდა.

მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა საბითუმო და საცალო ვაჭრობა (15.2%) და დამამუშავებელი მრეწველობა (11.1%). 

2022 წელს წინა წლის შესაბამის პერიოდთან შედარებით ზრდის მიმართულებით მნიშვნელოვანი წვლილი შეიტანა შემდეგმა დარგებმა:

• ტრანსპორტი და დასაწყობება (წლიური ზრდა 28.4%);
• ინფორმაცია და კომუნიკაცია (49.9%);
• ელექტროენერგიის აირის ორთქლის და კონდიცირებული ჰაერის მიწოდება (38.9%);
• მშენებლობა (14.8%);
• საბითუმო და საცალო ვაჭრობა; ავტომობილების და მოტოციკლების რემონტი (6.1%);
• დამამუშავებელი მრეწველობა (7.8%);
• ხელოვნება გართობა და დასვენება (17.3%);
• განთავსების საშუალებებით უზრუნველყოფის და საკვების მიწოდების საქმიანობები (16.7%);
• სამთომოპოვებითი მრეწველობა (22.8%).

კლება აღინიშნა შემდეგ დარგებში:

• უძრავ ქონებასთან დაკავშირებული საქმიანობები (წლიური კლება -4.8%);
• ჯანდაცვა და სოციალური მომსახურების საქმიანობები (-5.7 %);
• პროფესიული, სამეცნიერო და ტექნიკური საქმიანობები (-2.4%).