საქართველოში ვენახების კადასტრში 36 431 მევენახეა რეგისტრირებული, მათი ვენახები 45 313 ჰექტარზეა გაშენებული, მიწის ნაკვეთების რაოდენობა კი 127 122-ია.
გერმანიის საელჩოს მიერ გავრცელებული ინფორმაციის თანახმად, კახეთის, რაჭა-ლეჩხუმის, შიდა ქართლის, ქვემო ქართლის, სამცხე-ჯავახეთისა და მცხეთა-მთიანეთის რეგიონები ღვინის კადასტრში უკვე სრულადაა რეგისტრირებული, დასავლეთ საქართველოს სხვა რეგიონები კი მიმდინარე წლის განმავლობაში დარეგისტრირდება.
„ვენახების კადასტრი მოიცავს ინფორმაციას ვენახებით გაშენებული ტერიტორიების შესახებ და მას გადამწყვეტი მნიშვნელობა ენიჭება ღვინის ხარისხისა და ადგილწარმოშობის მონიტორინგის კუთხით.
ვენახების კადასტრი წარმოადგენს ქართული ღვინის ადგილწარმოშობის მიკვლევადობის ინსტრუმენტს და ღვინის ქარხნებს აძლევს მოსავლის ეფექტიანი მართვის შესაძლებლობას“, - აღნიშნულია საქართველოში გერმანიის საელჩოს მიერ გავრცელებულ ინფორმაციაში.
ცნობისთვის, ვენახების კადასტრის შექმნა საქართველოს ღვინის ეროვნულმა სააგენტომ გერმანიის საერთაშორისო თანამშრომლობის საზოგადოების (GIZ) ექსპერტის ანა იზაბელ ლუცის ხელშეწყობით 2014 წელს დაიწყო.