Lufthansa არ ელის ფრენების ჩვეულ რეჟიმში დაბრუნებას მომავალ წლამდე.
“სამწუხაროდ, ვერ მივაღწევთ მოკლევადიან გაუმჯობესებას ზაფხულში. ზოგადად, ველით სიტუაციის ნორმალიზებას 2023 წელს”, - განაცხადა Lufthansa-ს საბჭოს წევრმა დეტლეფ კაიზერმა Die Welt-თან ინტერვიუში. მისი თქმით, ერთადერთი გამოსავალი ფრენების რაოდენობის შემცირებაა.
გერმანულმა ავიაკომპანიამ ივლისსა და აგვისტოში დაგეგმილი 2200 შიდა და ევროპული ფრენა გააუქმა, რაც ამ პერიოდის განმავლობაში გადამზიდავის სიმძლავრის დაახლოებით 4%-ს შეადგენს.
Covid-19-ის შეზღუდვების მოხსნის შემდეგ ევროპაში მოგზაურობის მოთხოვნა მკვეთრად გაიზარდა. ზოგიერთ ავიაკომპანიას უჭირს მოთხოვნასთან გამკლავება და მგზავრებს უწევთ რიგში საათობით დგომა. სამუშაო ძალის დეფიციტი კი Covid-ის ახალ ტალღასთან ერთად კიდევ უფრო იზრდება.
Bloomberg-ის ორიგინალური სტატიის ავტორი: სტეფან კალი