„გალტ & თაგარტის“ მონაწილეობით, 27 აპრილს, 17:00 საათზე, „კაპიტალის ბაზრის მხარდაჭერის პროგრამის“ ახალი ფაზის წარდგენა გაიმართება. პროგრამა ევროპის რეკონსტრუქციისა და განვითარების ბანკის (EBRD) კაპიტალის და ფინანსური ბაზრების განვითარების გუნდის მიერ, ევროკავშირის ფინანსური მხარდაჭერით ხორციელდება. მის მთავარ მიზანს საქართველოში კაპიტალის ბაზრის განვითარების ხელშეწყობა წარმოადგენს.
„გალტ & თაგარტისა“ და BDO Georgia-ს ხელმძღვანელობით, პროგრამის პირველი ეტაპი ქართული კაპიტალის ბაზრების პოტენციალისა და იმ ბარიერების კვლევას დაეთმო, რომლებიც კომპანიებისთვის კაპიტალის ბაზრებზე წვდომას აფერხებს. პროგრამის მომდევნო ფაზა კი, თანადაფინანსების სქემაში მონაწილეობის მსურველთა აპლიკაციების მიღებასა და საგანმანათლებლო სქემის განხორციელებას დაეთმობა.
„წლებია, „გალტ & თაგარტი” ჩართულია საქართველოს კაპიტალის ბაზრის განვითარების პროცესში. მოხარული ვართ, რომ EBRD-ისა და ევროკავშირის მხარდაჭერით, გვეძლევა შესაძლებლობა BDO Georgia-სთან ერთად ჩვენი წვლილი შევიტანოთ მსგავსი მნიშვნელობის ინიციატივის განხორციელებაში. აღნიშნული პროექტი საქართველოში ხელს შეუწყობს როგორც კაპიტალის ბაზრებთან დაკავშირებით ცნობიერების ამაღლებას, ასევე ახალი მოთამაშეებისა და ემისიების გამოჩენას ბაზარზე. პროექტის მეორე ეტაპი ფოკუსირებულია კაპიტალის ბაზრის წახალისების მექანიზმის შექმნაზე. ეს შერჩეულ კომპანიებს სავალო ან/და წილობრივი საჯარო ფასიანი ქაღალდების გამოშვების გზით, კაპიტალის ბაზრის ათვისებაში დაეხმარება. გვჯერა, რომ აღნიშნული შესაძლებლობა არაერთ ადგილობრივ კომპანიას შეუწყობს ხელს საქმიანობის განვითარებაში, რის შედეგადაც ქართულ კაპიტალის ბაზრებს უფრო მეტი აქტიური მოთამაშე ეყოლება“, - განაცხადა „გალტ & თაგარტის“ მმართველმა დირექტორმა, ოთარ შარიქაძემ.
პროგრამის წარმდგენი ღონისძიების სპიკერებს შორის იქნებიან: ევროკავშირის დელეგაცია საქართველოში, ევროპის რეკონსტრუქციისა და განვითარების ბანკის, ეროვნული ბანკის საბჭოს, „გალტ & თაგარტისა“ და BDO Georgia-ს წარმომადგენლები.
ონლაინ ღონისძიებაზე დასასწრებად, ეწვიეთ ბმულს: https://bankofgeorgia.zoom.us/j/91444055535.
რეგისტრაციის პროცესი 27 აპრილს დაიწყება და 1.5 თვე გაგრძელდება, ხოლო მისი დასრულების შემდეგ 10-მდე გამარჯვებული კანდიდატი შეირჩევა.
პროექტში მონაწილეობის სურვილის შემთხვევაში, დაინტერესებულ პირს შეუძლია ეწვიოს სარეგისტრაციო ბმულს: https://bit.ly/3L9qOcm.
პროექტის მეორე ეტაპის შესახებ დეტალური ინფორმაცია ხელმისაწვდომია შემდეგ ბმულზე: https://bit.ly/3vyi897.