Sony Group-ის PlayStation-მა და Nintendo-მ შეაჩერეს მიწოდება რუსეთში და შეუერთდნენ სხვა კომპანიებს, რომლებმაც ქვეყანა უკრაინაში დაწყებული ომის საპასუხოდ დატოვეს.
ტოკიოში დაფუძნებულმა Sony-მ განაცხადა, რომ მისი ონლაინ PlayStation-ის მაღაზია, ისევე როგორც უახლესი Gran Turismo 7-ის გამოშვება, ასევე შეჩერებულია რუსეთში.
Nintendo-მ იგივე გადაწყვეტილება მიიღო ლოგისტიკისა და გადახდის დამუშავების გამოწვევების მოტივით. კომპანიამ ტექნიკურ რეჟიმში გადაიყვანა რუსული eShop მას შემდეგ, რაც ვერ შეძლო გადახდების დამუშავება რუბლით.
Xbox-ის მწარმოებელმა Microsoft-მა ანალოგიურად შეაჩერა ახალი პროდუქტებისა და სერვისების გაყიდვები რუსეთში.
ბიზნესების სია, რომლებიც წყვეტენ კავშირებს ან გადახედავენ რუსეთში საქმიანობას, სულ უფრო იზრდება. ზოგიერთი კომპანია მიიჩნევს, რომ რისკები, როგორც რეპუტაციული, ასევე ფინანსური, ძალიან დიდია იმისთვის, რომ რუსეთში ოპერირება გააგრძელონ.
Bloomberg-ის ორიგინალური სტატიის ავტორი: ვლად სავოვი და იუკი ფურუკავა