დიდმა ბრიტანეთმა 200 ჯარისკაცი გაგზავნა ლონდონის საავადმყოფოებში, რათა დაეხმარონ პერსონალს ომიკრონის მკვეთრ ზრდასთან გასამკლავებლად.
თავდაცვის სამინისტრო სამი კვირის განმავლობაში უზრუნველყოფს 40 მედიკოსს და 160 გენერალურ მორიგე პერსონალს, რათა დედაქალაქის ჯანდაცვის ეროვნული სამსახურის (NHS) საავადმყოფოებმა შეძლონ, გაუმკლავდნენ შემთხვევების მზარდ რაოდენობას.
თავდაცვის სამინისტროს თანახმად, სამხედრო მედიკოსები ლონდონში NHS პერსონალს დაეხმარებიან პაციენტების მოვლაში, ხოლო გენერალური მორიგე პერსონალი მხარს დაუჭერს ისეთ ამოცანებს, როგორიცაა მარაგების შენარჩუნება და ძირითადი შემოწმების ჩატარება.
საგანგებო განლაგება ხდება მას შემდეგ, რაც პარასკევს გამოქვეყნებულმა ოფიციალურმა მონაცემებმა აჩვენა, რომ 2 იანვარს ინგლისში ჯანდაცვის სისტემის 82,000-ზე მეტი თანამშრომელი ვერ გამოცხადდა სამსახურში, მათგან თითქმის ნახევარი კოვიდთან დაკავშირებული მიზეზების გამო. მათ შორისაა იზოლაციაში მყოფი 4,765 სამედიცინო პერსონალი ლონდონში.
პრემიერ-მინისტრი ბორის ჯონსონი მკაცრი შეზღუდვების წინააღმდეგია. შედეგად, ზეწოლა იზრდება ქვეყნის საავადმყოფოებზე, რომლებიც პანდემიის გარეშეც კი ხშირად იტვირთება ზამთარში. მიუხედავად ამისა, პრემიერ-მინისტრმა მიმდინარე კვირის დასაწყისში თქვა, რომ დიდ ბრიტანეთს შეუძლია ინფექციების ტალღას ქვეყნის ხელახლა ჩაკეტვის გარეშე “გაუძლოს”.
“ომიკრონი ნიშნავს მეტი პაციენტის მკურნალობას და ნაკლებ პერსონალს მათ სამკურნალოდ. შემთხვევები საავადმყოფოებში ყველაზე მაღალია გასული წლის თებერვლის შემდეგ, რაც კიდევ უფრო მეტ ზეწოლას ახდენს შრომისმოყვარე პერსონალზე”, - განაცხადა NHS-ის ეროვნულმა სამედიცინო დირექტორმა, სტივენ პაუისმა.
Bloomberg-ის ორიგინალური სტატიის ავტორები: ემილი ეშტონი და ირინა ანგჰელი