Pfizer-მა აშშ-ის მარეგულირებლებს მაღალი რისკის ჯგუფში Covid-19-ის სამკურნალო აბების გადაუდებელი გამოყენების ავტორიზაციისთვის მიმართა.
სიახლის გამოქვეყნების შემდეგ, ნიუ იორკში კომპანიის აქციები 0.5%-ით გაიზარდა.
Pfizer-ი აბების წარმოებისა და დისტრიბუციაში $1 მილიარდის ჩადებას გეგმავს. Covid-ის სხვა სამკურნალო საშუალებებისგან განსხვავებით, მისი გამოყენება სახლშიც შეიძლება.
Bloomberg-ის წყაროს ცნობით, აშშ-ის პრეზიდენტის ადმინისტრაცია აპირებს 10 მილიონი პაციენტის სამკურნალოდ სამყოფი ამბები შეიძინოს.
ნოემბრის დასაწყისში გამოქვეყნებული კვლევის შედეგებით, Paxlovid-მა მაღალი რისკის მქონე პაციენტებში ჰოსპიტალიზაციისა და გარდაცვალების მაჩვენებელი 89%-ით შეამცირა.
Pfizer-ის აღმასრულებელი დირექტორის, ალბერტ ბურლას თქმით, კომპანია სხვადასხვა ქვეყნის მარეგულირებელს მალე მიმართავს, რათა სამკურნალო საშუალება პაციენტებისთვის ხელმისაწვდომი გახდეს.
გუშინ ცნობილი გახდა, რომ Pfizer-ი წამლების მწარმოებელ კომპანიებს საშუალებას მისცემს, გამოუშვან Covid-19 აბების იაფი ვერსიები დაბალი და საშუალო შემოსავლის მქონე 95 ქვეყნისათვის. შედეგად, წამლის მწარმოებელი კომპანიები დაიწყებენ მის მიწოდებას ქვეყნებში, რომელთა მოსახლეობაც მსოფლიო მოსახლეობის დაახლოებით 53%-ს შეადგენს.
Bloomberg-ის ორიგინალური სტატიის ავტორი: რაილი გრიფინი