Pfizer-მა და მისმა პარტნიორმა კომპანია BioNTech-მა აშშ-ისა და ევროპის მარეგულირებელ ორგანოებს Covid-19 ვაქცინის „ბუსტერ“ დოზის ეფექტიანობის შესახებ კვლევის წინასწარი მონაცემები წარუდგინეს.
მონაცემები აჩვენებს, რომ ვაქცინის მე-3 დოზამ აცრიდან რვა-ცხრა თვეში დამცავი ანტისხეულების უფრო მაღალი დონე განავითარა. კომპანიები კვლევის უფრო დიდი და ბოლო ფაზის შედეგებს უახლოეს მომავალში ელიან.
გასულ თვეს Pfizer-მა განაცხადა, რომ იგი აშშ-ის მარეგულირებლებს ვაქცინის მე-3 დოზისთვის გადაუდებელი გამოყენების ნებართვისთვის მიმართავდა ადრეული მონაცემების საფუძველზე, რომელიც აჩვენებს, რომ ვაქცინას შეუძლია მკვეთრად გაზარდოს დაცვა კორონავირუსისგან და მისი შტამებისგან, მათ შორის დელტა ვარიანტისგან.
ამჯერად კომპანიები განსხვავებულ გზას ადგანან, რადგან მათ „ბუსტერის“ ოფიციალური დამტკიცება სურთ და არა საგანგებო ავტორიზაცია. Pfizer-ისა და BioNTech-ის განცხადებით, ისინი გეგმავენ FDA-ს მე-3 დოზისთვის ბიოლოგიის ლიცენზიის განაცხადით მიმართონ, მიუხედავად იმისა, რომ ორი დოზისთვის მაისში შეტანილი განაცხადი ჯერ კიდევ დამუშავების პროცესშია.
გასულ კვირაში აშშ-ის ჯანდაცვის უწყებებმა Moderna-სა და Pfizer/BioNTech-ის Covid-19-ის ვაქცინების მესამე დოზის გამოყენება მხოლოდ იმუნოკომპრომისული პირებისთვის დაამტკიცა.
გუშინ ცნობილი გახდა, რომ, შესაძლოა, Covid-19-ის ვაქცინის “ბუსტერი” სექტემბრის მეორე ნახევრიდან ყველა ამერიკელს შესთავაზონ.
Bloomberg-ის ორიგინალური სტატიის ავტორი: რაილი გრიფინი და რობერტ ლენგრეტი