აშშ-ის “სურსათისა და წამლის ადმინისტრაცია” მიზნად ისახავს სექტემბრის დასაწყისისთვის Pfizer-ის COVID-19-ის ვაქცინას სრული ავტორიზაცია მიანიჭოს. ამის შესახებ ინფორმაციას New York Times-ი საკუთარ წყაროზე დაყრდნობით ავრცელებს.
გამოცემა ვაქცინის დამტკიცების არაოფიციალურ დედლაინად 6 სექტემბერს ასახელებს.
აშშ-ის პრეზიდენტმა, ჯო ბაიდენმა გასულ კვირას განაცხადა, რომ ვაქცინისთვის სრული ავტორიზაციის მინიჭება მოსალოდნელია ადრეული შემოდგომისთვის.
ვაქცინის დამტკიცების შესახებ განხილვის პროცესი, როგორც წესი, ექვსი თვის განმავლობაში მიმდინარეობს, მაგრამ აშშ-ის მარეგულირებელი ცდილობს, რომ ეს პროცესი დააჩქაროს. პარასკევს სააგენტომ დაადასტურა, რომ Pfizer-ის აპლიკაციას მაქსიმალურად სწრაფად განიხილავს.
ამერიკული ფარმაცევტული კომპანია Pfizer-ი და მისი გერმანელი პარტნიორი BioNTec-ი კორონავირუსის ვაქცინის პირველი მწარმოებლები არიან, რომლებმაც ვაქცინის სრული ავტორიზაციის მისაღებად FDA-ს მაისის დასაწყისში მიმართეს.
ვაქცინამ გადაუდებელი გამოყენების ავტორიზაცია 2020 წლის ბოლოს მიიღო.
ვაქცინის სრული ლიცენზიის მისაღებად ამერიკულ მარეგულირებელს Moderna-მაც მიმართა.
გამოცემები ვარაუდობენ, რომ ვაქცინისთვის სრული ავტორიზაციის მინიჭება პრეპარატების მიმართ ნდობას გაზრდის და იმუნიზაციის პროცესს დააჩქარებს.