ავიაკომპანიებმა Isr Air და Arkia აგვისტოში თელ-ავივიდან დაგეგმილი 27 რეგულარული რეისიდან 21 გააუქმეს. ამის შესახებ "ბიზნეს ფორმულას" Tav Georgia-ში განუცხადეს.
თბილისისა და ბათუმის საერთაშორისო აეროპორტების მმართველ კომპანიაში ასევე აცხადებენ, რომ ჯერჯერობით უცნობია ფრენების გაუქმებასთან დაკავშირებით რა გადაწყვეტილებას მიიღებს ავიაკომპანია EL Al, რომელსაც აგვისტოში 17 რეგულარული რეისის შესრულება ჰქონდა დაგეგმილი.
"თელ-ავივის მიმართულებით ფრენებს ასრულებენ თბილისის საერთაშორისო აეროპორტში ბაზირებული ავიაკომპანიები: Georgian Airways-ი და Myway Airlines-ი (ჯამში კვირაში 16 სიხშირე). ამ ეტაპზე მათ ფრენების გაუქმებასთან დაკავშირებით გადაწყვეტილება არ მიუღია.
რაც შეეხება თელ-ავივი-ბათუმის მიმართულებას, ავიაკომპანია Arkia-მ აგვისტოში ფრენები საერთოდ გააუქმა. სიხშირეები შეამცირეს ავიაკომპანიებმა – El Al და Isr Air-ი. აღსანიშნავია, რომ აგვისტოში დაგეგმილი 66 რეგულარული ფრენიდან 49 ფრენა უკვე გაუქმდა. გაუქმებული რეისების შედეგად აგვისტოში ფრენების რაოდენობა ბათუმის საერთაშორისო აეროპორტში 74%-ით შემცირდება",- აცხადებენ კომპანიაში.
30 ივლისიდან საქართველო შედის "წითელი" ქვეყნების სიაში, სადაც ისრაელელი ვიზიტორებისთვის გამგზავრება ნებადართული აღარ იქნება (გამონაკლისი შემთხვევების გარდა).