შეერთებული შტატების პრეზიდენტმა, ჯო ბაიდენმა თეთრ სახლში გამართულ ცერემონიაზე ხელი მოაწერა აღმასრულებელ ბრძანებას, რომელიც ამერიკულ ინდუსტრიებში კონკურენციის ზრდას ხელს შეუწყობს.
მიუხედავად იმისა, რომ ახალი რეგულაციების შემუშავება და განხორციელება შეიძლება თვეები გაგრძელდეს, თეთრმა სახლმა ნათლად აღნიშნა, რომ აღმასრულებელმა ბრძანებამ შეიძლება მნიშვნელოვანი ცვლილებები გამოიწვიოს, რაც დიდ გავლენას მოახდენს რამდენიმე ინდუსტრიაზე.
ბრძანების ერთ-ერთი ელემენტი იუსტიციის დეპარტამენტისგან ითხოვს, იმუშაოს მარეგულირებელ სააგენტოებთან უცხოური საზღვაო ტრანსპორტის ალიანსებისა და მონოპოლიზებული სარკინიგზო მარშრუტების წინააღმდეგ, რომლებიც, ადმინისტრაციის აზრით, ქვეყნის მასშტაბით გადაზიდვის ხარჯებს ზრდის.
”ხალხის უმეტესობისთვის მართებულად არ ჟღერს, რომ არსებობს სამი გადამზიდავი კომპანია, რომლებიც დომინირებენ ბაზარზე და ზრდიან ხარჯებს მომწოდებლების, მცირე ბიზნესისა და ხალხისთვის ქვეყნის მასშტაბით”, - განაცხადა თეთრი სახლის სპიკერმა ჯენ ფსაკიმ.
აღმასრულებელი ბრძანება ასევე უბიძგებს ფედერალურ სავაჭრო კომისიას, აკრძალოს ან შეზღუდოს კონკურენციის გარეშე ხელშეკრულებები და ზედმეტი პროფესიული სალიცენზიო შეზღუდვები. გარდა ამისა, ადმინისტრაცია შეეცდება ანტიმონოპოლური რეგულირების განმტკიცებას, რათა დამქირავებლებს ხელი შეუშალოს თანამშრომლების ხელფასებისა და შეღავათების შემცირებაში კომპენსაციის შესახებ ინფორმაციის გაზიარების საშუალებით.
სავარაუდოდ, თეთრი სახლი სთხოვს FTC-ს, გამოაქვეყნოს ახალი წესები, რომლებიც ხელს შეუწყობს "შეკეთების უფლებას". კომპანიები შეზღუდავენ მომხმარებლების შესაძლებლობას, გამოიყენონ დამოუკიდებელი სარემონტო მაღაზიები, ან თავად შეაკეთონ მოწყობილობები. ამ მოქმედებას შეუძლია გავლენა იქონიოს ყველაზე - სოფლის მეურნეობის მწარმოებლებზე, რომლებიც ითხოვენ ტრაქტორის დილერის მომსახურებას და ისეთ ტექნოლოგიურ გიგანტებზეც, როგორებიცაა Apple და Microsoft, რომლებიც ზღუდავენ მობილური ტელეფონების და სათამაშო კონსოლების შეკეთებას.
Bloomberg-ის ორიგინალური სტატიის ავტორი: ჯასტინ სინკი