Pfizer-ისა და Moderna-ს Covid-19-ის საწინააღმდეგო ვაქცინები აცრილ პირებს არა მხოლოდ ვირუსის მწვავე მიმდინარეობისგან იცავენ, არამედ მისი პრევენციის უნარიც აქვთ.
აშშ-ის დაავადებათა კონტროლისა და პრევენციის ცენტრის (CDC) მონაცემებით, ორივე დოზით აცრის შემთხვევაში, ვაქცინა 90%-იან პრევენციას უზრუნველყოფს.
ამასთან, მკვლევრების თქმით, ვირუსისგან დაცვის მნიშვნელოვანი მაჩვენებელი პირველი დოზით აცრიდან ორ კვირაში დაფიქსირდა.
რეალურ პირობებში 4 000 აცრილ პირზე რამდენიმეთვიანი დაკვირვებით, მკვლევრები ასკვნიან, რომ mRNA ტექნოლოგიაზე დამზადებული ვაქცინები ვირუსის გავრცელებას უშლის ხელს. ისრაელში ჩატარებულმა ადრეულმა კვლევამ აჩვენა, რომ Pfizer-ის ვაქცინის ერთმა დოზამ ინფექციის გავრცელება 85%-ით შეამცირა.
კვლევის შედეგებს სპეციალისტები დამაიმედებელს უწოდებენ და აცხადებენ, რომ ეს ვაქცინაციის მნიშვნელობას კიდევ ერთხელ ადასტურებს.
წინა კვლევებით, ასევე, დადასტურდა, რომ აცრა ამცირებს კოვიდინფიცირებულთა გარდაცვალებისა და ჰოსპიტალიზაციის რიცხვს.
ცნობისთვის, ამერიკულ-გერმანული Pfizer/BioNtech-ის ვაქცინით აცრა საქართველოში დღეს დაიწყო. ამ ვაქცინის 29 500 დოზა თბილისში 25 მარტს ჩამოვიდა.
Bloomberg-ის ორიგინალური სტატიის ავტორი: ჯონ ტოცი