Netflix-ს კონკურენცია ეზრდება. Walt Disney ვიდეო სტიმინგის სერვისის, "Disney+"-ის გაფართოებას გეგმავს. კომპანიაში დარწმუნებულები არიან, რომ 2024 წლისთვის მათი სერვისის გამომწერთა რაოდენობა 350 მილიონს მიაღწევს.
იზრდება არხის გამოწერის საფასურიც. აშშ-ში ყოველთვიური ღირებულება 8 დოლარამდე, ევროპაში კი - 9 ევრომდე ($11) გაიზრდება.
„უზარმაზარმა წარმატებამ შთაგვაგონა, უფრო მეტად ამბიციურები ვყოფილიყავით. ჩვენი არხი იმაზე ძლიერია, ვიდრე წარმოგვედგინა,“ განაცხადა Disney-ს სამეთვალყურეო საბჭოს თავმჯდომარემ, ბობ აიგერმა.
Disney-ის არხზე მომავალ წელს “მარველის” და “ვარსკვლავური ომების” 10-10 სერია გახდება ხელმისაწვდომი. ასევე Pixar-ის და Disney Animation-ის 15-15 სერია. ახალი პროგრამირების ჩამონათვალში შედის სრულმეტრაჟიანი მხატვრული ფილმი “Raya and the Last Dragon.” სტრიმინგზე ასევე ხელმისაწვდომი იქნება „პინოქიოს“ სერიები ტომ ჰენქსის მონაწილეობით.
ამჟამად "Disney+"-ს 86.8 მილიონი გამომწერი ჰყავს, მაშინ როცა ოქტომბრის დასაწყისში ეს მაჩვენებელი 73 მილიონს შეადგენდა. გეგმის მიხედვით, 2024 წლის ბოლომდე კომპანიამ ეს მაჩვენებელი თითქმის სამჯერ უნდა გაზარდოს.
Bloomberg-ის ორიგინალური სტატიის ავტორი: ქრისტოფერ პალმერი