შემოსავლების სამსახურის ინფორმაციით, 2022 წლის განმავლობაში ქვეყნის მასშტაბით 174 781 კოლოფი (2021 წლის მაჩვენებელზე 19%-ით მეტი) და 463 კილოგრამზე მეტი (2021 წლის მაჩვენებელთან შედარებით 25%-ით ნაკლები) უაქციზო თამბაქოს ნაწარმის მართლსაწინააღმდეგო შენახვა-გადაზიდვის 2 481 ფაქტი გამოავლინეს, რაც 2021 წლის ანალოგიურ მაჩვენებელთან შედარებით 55%-ით მეტია.
შემოსავლების სამსახურში აღნიშნავენ, რომ კანონდამრღვევ მოქალაქეებს უაქციზო საქონელი ჩამოერთვათ.
მათივე განმარტებით, 1 456 ფაქტზე შედგა ადმინისტრაციული სამართალდარღვევის ოქმები და საქმის მასალები ქვემდებარეობის მიხედვით სასამართლოს გადაეგზავნა. მაჩვენებელი წლიურად 75%-ითაა გაზრდილი.
38 ფაქტზე საქმის მასალები საქართველოს ფინანსთა სამინისტროს საგამოძიებო სამსახურს გადაეგზავნა, რაც შარშანდელ მონაცემებთან შედარებით 21%-ით ნაკლებია.
ამასთან, 2021 წლის მაჩვენებელთან შედარებით, 2022 წელს 37%-ით გაიზარდა არაიდენტიფიცირებულ შემთხვევათა რაოდენობა და ჯამში 987 იყო. აღნიშნულ ფაქტებზე შედგა ამოღების ოქმები.